O 17 de decembro tivo lugar unha sesión extraordinaria do pleno municipal do Concello de Cabanas para tratar dous asuntos na orde do día: o expediente de responsabilidade patrimonial da sentenza O Penso (1ª fase) e o expediente sancionador a Viaqua. Eis o resumo do mesmo coas nosas propostas.

1. Expediente responsabilidade patrimonial execución sentenza O Penso 1ª fase

A contagotas a oposición foi recibindo documentación relativa a este punto (Conclusións do Consello Consultivo - Informe de Secretaría Intervención - Informe Servizos Técnicos - Nova proposta Instrutor acordo Indemnizacións).

Na nosa intervención lembramos o espectáculo vivido no pleno de setembro, no que o Alcalde obrigou a facer unha votación sen garantías legais, que non saiu adiante grazas ao voto en contra da oposición. Así mesmo, explicamos novamente a postura do BNG sobre o Penso: queremos dar unha solución definitiva a este problema, dar cumprimento á sentenza e facelo de xeito satisfactorio para a veciñanza do edificio, establecendo indemnizacións xustas e ofrecendo un lugar para que as afectadas - directa e indirectamente - polas demolicións teñan un lugar para pasar as obras.

Denunciamos que, ao igual que aconteceu en setembro, o Alcalde levou a pleno un acordo que non cumpre cos requisitos mínimos para ser aprobado: na proposta do instrutor fálase de deixar sen efecto un acordo que teoricamente non existe; na relación de afectados non figuran os herdeiros dunha persoa falecida que tiña o piso en réxime de gananciais; as superficies medidas polo técnico do Concello e a recollida na valoración non se corresponden coa reflectida na escritura notarial de compra... Todas estas eivas fan que sexa inaprobábel, porque lonxe de amañar a situación o único que fai é expór á veciñanza a posíbeis novos pleitos.

No transcurso do debate propúxose votar que quedase o tema adiado e se convocase un novo pleno nun prazo máximo de 10 días coas propostas elaboradas correctamentea >> APROBADO: 6 votos a favor (BNG / PSOE / AEC / Somos Cabanas); 5 votos en contra (PP). *A día 30 de decembro o pleno segue sen estar convocado.

2. Expediente sancionador a Viaqua

No BNG amosamos estar de acordo en levar adiante este expediente sancionador ante os incumprimentos reiterados de Viaqua coas súas obrigas contractuais (reparacións da rede, solución a inundacións, problemas de bombeo...). Ademais, o concelleiro Iago Varela explicou como o modelo de concesións para a prestación de servizos básicos estase a demostrar como inadecuado, e puxo riba da mesa a necesidade de ir rescantándoas para a xestión pública.

Manifestamos a nosa intención de traballar para que no 2020 (ano no que finaliza a concesión da auga) o Concello asuma a xestión da auga, ben a través de medios propios ou mancomunados con outros concellos, mais tamén propuxemos estudar a posibilidade de retirar xa a concesión que ten Viaqua dada a gravidade das infraccións cometidas por esta empresa.

Esta última cuestión quedou no aire, e só se votou a expediente sancionador >> APROBADO: 10 votos a favor (BNG / PP / PSOE / Somos Cabanas); 1 abstención (AEC)