CAMIÑO INGLÉS

Cae a ponte do Camiño Inglés en Cabanas ao paso dun veciño

colapso ponte vilar do colo
Estado da ponte tras caer ao paso dun veciño

Esta fin de semana caeu a ponte do Camiño Inglés en Vilar do Colo ao paso dun veciño, que sufriu mazaduras e contusións de diversa consideración. O BNG levaba máis dun ano alertando da situación precaria da ponte sen que desde o Concello de Cabanas tomasen medidas de prevención.

Cae a ponte do Camiño Inglés en Cabanas ao paso dun veciño

Esta fin de semana colapsou a ponte sobre o trazado alternativo do Camiño Inglés ao seu paso polas inmediacións do polígono de Vilar do Colo, en Cabanas. A ponte caeu ao paso dun veciño, que sufriu mazaduras e contusións de diversa consideración, a causa do seu mal estado de conservación.

O estado precario desta ponte leva sendo denunciado polo BNG de Cabanas desde o ano pasado. A primeira denuncia tivo lugar no pleno de outubro de 2015, mais desde o goberno local non se tivo en consideración. Tras máis dun ano de inacción do goberno de Germán Castrillón, o BNG dirixiuse á Dirección Xeral do Patrimonio Cultural a comezos do mes de novembro deste ano, para alertar da situación e urxir a que se tomasen as medidas oportunas para solucionar o estado da ponte. Finalmente, esta fin de semana, a ponte caeu, sen que nin concello nin Patrimonio chegasen a actuar.

“Este accidente demostra a falta de responsabilidade de Germán Castrillón e o seu equipo, que saben deste problema desde hai máis dun ano, e non fixeron nada” sinalou o voceiro municipal do BNG, Iago Varela. “É unha mostra máis da incapacidade do PP para solucionar os problemas do concello e da veciñanza de Cabanas”.

O portavoz do Bloque tamén informou de que a organización nacionalista rexistrou unha iniciativa para “solicitar que se adopten inmediatamente medidas de prevención para evitar o paso de persoas polo lugar e novos accidentes, así como que se inicien os traballos de reposición da ponte coa maior brevidade posíbel”.

Cae a ponte do Camiño Inglés en Cabanas ao paso dun veciño